የተሃድሶ ሠልጣኞች ህዝባቸውን መካስ ይገባቸዋል – ጽህፈት ቤቱ

የተሃድሶ ሥልጠና ወስደው ወደ አካባቢያቸው የተመለሱት የተሃድሶ ሥልጠና ተመራቂዎች  ህዝባቸውን መካስ እንደሚጠበቅባቸው የመንግሥት ኮሚኒኬሽን ጽህፈት ቤት አስታወቀ ።

ጽህፈት ቤቱ በላከው ሳምንታዊ መግለጫ እንዳመለከተው ከትናንት በስተያ 11ሺ 352 የሚሆኑ የሁለተኛ ዙር  የተሃድሶ ሠልጣኞች አስፈላጊው የግንዛቤ  ማስጨበጫ ሥልጠና ወስደው በመመረቃቸው ከህብረተሰቡ ጋር እንዲቀላቀሉ ተደርጓል  ።

የሁለተኛ ዙር ሠልጣኞቹ በአራት ማዕከላት ለ20ቀናት በህገ መንግሥቱ፣ ህገመንግሥታዊ ሥርዓቱ፣  አገሪቱ ስላለፈችበት  ሂደትና የወደፊቱ አቅጣጫ  ላይ የነበራቸውን  ግንዛቤ የሚያሳድግ ሥልጠና ተሠጥቷል ።        

በመጀመሪያው  ዙር የተሃድሶ ሥልጠና ወስደው  የተመረቁት  9ሺ 800 ያህል ሠልጣኞች ከህብረተሰቡ ጋር ተቀላቅለው ገንቢ ሚና እየተጫወቱ መሆኑን የጠቆመው መግለጫው  የሁለተኛው ዙር ተመራቂዎችም ተመሳሳይ ገንቢ ሚና ይጫወታሉ ተብሎ ይጠበቃል ብሏል ።

ሠልጣኞች   ወደ መደበኛ ሥራዎቻቸውና ህይወታቸው በሚመለሱበት ጊዜ የሚመለካታቸው አካላት በሙሉ  ተገቢውን ትብብር እንደሚያደርጉላቸው  የጽህፈት ቤቱ መግለጫው አትቷል ።      

ሠልጣኞች  ወደ ህብረተሰቡ በሚቀላቀሉበት ወቅት ያገኙትን ሥልጠና ተጠቅመው በልማቱ ውስጥ  የተሻለ ተሳትፎ በማድረግ ፤ ሌሎች የግንዛቤ እጥረት ያለባቸውን ማስተማርናማረም እንዳለባቸው በመግለጫው ተመልክቷል ።