ኢፌዴሪ አየር ኃይል ም/አዛዥ ለኤር ሎጅስቲክስ፣ በህግ ማስከበር ዘመቻው ኃላፊነታቸውን በብቃት ለተወጡ እና ተቋማዊ የለውጥ ጉዞው ስኬታማነት የድርሻቸውን ላበረከቱ የሰራዊቱ አመራሮችና አባላት እውቅና ሰጠ::
የኢፌዴሪ አየር ኃይል ዋና አዛዥ ሜጀር ጄነራል ይልማ መርዳሳ በመልዕክታቸው ይሆናል ብለን ፍጹም ባላስብንበት ሁኔታ ከሃዲው የህወሐት ጁንታ ጥቃት ቢፈጽምብንም አየር ኃይላችን በተለመደ ህዝባዊ ጀግንነቱ የጽንፈኛውን አከርካሪ በመስበር በአጭር ጊዜ ውስጥ ታላቅ ድል አስመዝግበናል ብለዋል፡፡
ለተቋሙ ወሳኝ የድል ጉዞ የሁሉም አየር ኃይል ክፍሎች የተቀናጀ ጥምረትና የጋራ ድምር ውጤት መሆኑን ያወሱት ዋና አዛዡ በተለይም ምክትል አዛዥ ለኤር ሎጂስቲክስ ያበረከተው ጉልህ አስተዋጽኦ ትልቅ ምስጋናና ክብር የሚያሰጥ አኩሪ ተግባር መሆኑን አስረድተዋል፡፡
ም/አዛዥ ለኤር ሎጀስቲክስ ብ/ጄ ነገራ ሌሊሳ በበኩላቸው፣ ኤር ሎጀስቲክስ ከዚህ በበለጠ ዝግጁነት ውጤታማነቱን በማረጋገጥ ለተቋሙ የለውጥ ስኬት ተልእኮውን በትጋት ይወጣል ብለዋል፡፡
በስራ አፈጻጸማቸው የምስጋናና እውቅና ሽልማት መሰጠቱ፣ ቀጣይ ለሚያከናውኑት ተግባር ተነሳሽነትን የሚፈጥር የሞራል ስንቅ መሆኑን የሰራዊቱ አባላት አስረድተዋል፡፡
በኢፌዴሪ አየር ኃይል ከአራቱ ምክትሎች አንዱ የሆነው ምክትል አዛዥ ለኤር ሎጀስቲክስ፣ የምድር ድጋፍ ሰጪ ተሸከርካሪዎችን፣ የአቪየሽን ድጋፍ ሰጪ መሳሪያዎችን ኤሌክትሪካልና ኤሌክትሮኒክስ ሬዲዮ ጥገናዎችን በማከናወንና በሌሎችም ዘርፎች የድርሻውን እየተወጣ የሚገኝ ክፍል መሆኑ ተጠቅሷል፡፡
(ምንጭ፡- መከላከያ ሰራዊት)