በመጋቢት ወር ብቻ ከ4 በላይ ብሔራዊ ፓርኮች እና ጥብቅ ደኖች ላይ የእሳት አደጋ ተከስቷል

በተደጋጋሚ በፓርኮቹ ላይ የሚደርሰውን የእሳት አደጋ በዘላቂነት ለመፍታትም በሁሉም ብሔራዊ ፓርኮች ላይ “የእሳት መከላከል ብርጌድ” ተቋቁሞ ወደ ስራ መገባቱ ተገልጿል።

የኢትዮጵያ ዱር እንስሳት ልማትና ጥበቃ ባለስልጣን ምክትል ዋና ዳይሬክተር አቶ ሰለሞን መኮንን ለኢዜአ እንደገለጹት፤ በተያዘው መጋቢት ወር ብቻ በአማራ፣ ኦሮሚያ፣ አፋርና ደቡብ ክልሎች ከአራት በላይ የሚሆኑ ብሔራዊ ፓርኮች ላይ የእሳት አደጋ ተከስቷል።

አላይ ዴጌ አሰቦት እጩ ብሔራዊ ፓርክ፣ ሰሜን ተራሮች ብሔራዊ ፓርክ፣ ባሌ ተራሮች ብሔራዊ ፓርክ እንዲሁም አማራ ክልል ሰሜን ሸዋ ዞን ጣርማ በር ወፍ ዋሻ ላይ ተመሳሳይ አደጋዎች መከሰታቸውን ገልጸዋል።

በአብዛኛው በፓርኮች ላይ የሚደርሱ የሰደድ እሳት አደጋዎች ሰው ሰራሽ ሲሆኑ ከህገ-ወጥ ሰፈራ፣ እርሻ፣ ደን ጭፍጨፋ፣ አደንና ከሰል ማክሰል ጋር በተያያዘ የሚከሰቱ መሆናቸው ተገልጿል።