የም/ጠ/ኢታማዦር ሹም አበባው ታደሰ በወሎ ግንባር ውይይት

መስከረም 6/2014 (ዋልታ) የመከላከያ ኃይሎች ምክትል ጠቅላይ ኢታማዦር ሹም ጀነራል አበባው ታደሰ በሰሜን ወሎ ግንባር ተገኝተው ከዕዙ ከፍተኛ አመራሮች ጋር በግዳጅ አፈፃፀም ዙሪያ ተወያዩ።

በግንባሩ የተገኙት ምክትል ጠቅላይ ኢታማዦር ሹሙ፤ ለምንም የማይበገረው ሰራዊት ከቀደምት የኢትዮጵያ ታሪክ በመነሳት ለህይወቱ ሳይሳሳ በአገሪቱ ኅልውና ላይ የተጋረጠውን አሸባሪ ኃይል ለመደምሰስ እያደረገ ያለውን ስኬታማ ኦፕሬሽን አድንቀዋል።

ጀነራል አበባው ሰራዊቱ በተደጋጋሚ የሚያስመዘግባቸው ድሎች የሽብርተኛውን ኃይል ለመደምሰስ አስተማማኝ ቁመና ላይ መሆኑን ማሳያ ነው ብለዋል፡፡

አክለውም ለላቀ ግዳጅ አፈፃፀምም አቅም የመፍጠሩ ተግባር ተጠናክሮ መቀጠል እንዳለበት አሳስበዋል።

የማዕከላዊ ዕዝ ዋና አዛዥ በበኩላቸው ፣ ሰራዊታችን ህዝባዊነት ባህሪውን አስጠብቆ አሸባሪውን ሀይል አንገት እያስደፋ የወረራቸውን አንዳንድ ቦታዎች በማስለቀቅ አኩሪ ታሪክ እየሰራ መሆኑን አረጋግጠዋል፡፡

አሸባሪው የትሕነግ ቡድን በሕዝብ ላይ እያሳደረ ያለውን ግፍና በደል በመገንዘብ በአጭር ጊዜ እርምጃ በመውሰድ የተፈናቀለውን ማኅበረሰባችን ወደ ቀየው እንዲመለስ ለማድረግ ግምባር ላይ ያለው ኃይላችን የጠላትን ቅስም እየሰበረ ነውም ብለዋል።

እንደመከላከያ ሰራዊት መረጃ ተቋሙም በአሁኑ ወቅት ብቁ ሰራዊትን በማፍራት አስተማማኝ የዝግጁነት ምዕራፍ ማጠናቀቁን ተናግረዋል።